ყველაფერი შეიძლება ერთ წუთში დასრულდეს, მდიდრული ცხოვრება, კეთილმოწყობილი კარიერა, დადებითი შთაბეჭდილება სხვის თვალში, ახლო ურთიერთობები, ჩვენი სიცოცხლეც კი…
ვხედავთ, რომ ყველაფერი დროშია მოქცეული და უძლურნი ვართ ამ მოვლენის მიმართ.
დრო მიდის, და თითქოს უფრო ახლოს არის ის ერთი წუთი, როცა რაღაც დასრულდება.
ახლა და ამ წამს, როდესაც ამ ტექსტს კითხულობ, ვიღაცისთვის დგება ის ერთი წუთი, ახლაც, და ახლაც…
ალბათ მკითხავ: მაშ, რისთვის უნდა ვიცხოვროთ? თუკი ასე მარტივად დასრულდება ყოველგვარი კეთილდღეობა, აქვს კი რაიმეს საერთოდ აზრი?
ალბათ, ერთხელ მაინც განგიცდია ცხოვრებაში ისეთი ბედნიერება, როდესაც ინატრე
დროის გაჩერება…
ეს იმის მიმანიშნებელია, რომ ადამიანის შინაგანი სამყარო მარადიულობისაკენ ისწრაფვის.
თითქოს ადამიანთა სიცოცხლე ხანმოკლეა და ყველამ იცის ეს, მაგრამ ისინი ყველაფერს აკეთებენ იმისათვის, რომ თავიანთ სიცოცხლეს უფრო მეტი დღე შემატონ.
ბიბლიაში დაწერილია, რომ უფალმა „თვით მარადიულობა ჩადო ადამიანთა გულებში, თუმცა ისინი ბოლომდე ვერ სწვდებიან ღვთის ნამოქმედარს.“
ჩვენ, მე და შენ, არ ვართ ერთი დღისთვის მოვლენილნი ამქვეყნად.
მე და შენ გაცილებით დიდი მისია გვაკისრია. ჩვენ უნდა ვიცხოვროთ ღირსეულად და უნდა ვაამოთ ღმერთს, აქ და ამ ცხოვრებაში. ამისათვის არ არის საჭირო, დაელოდო ხვალინდელ დღეს, არ არის საჭირო, დაელოდო სამსახურის დასრულებას ან ოჯახის წევრების დაძინებას, არ დაელოდო დაღამებას ან გათენებას.
ეს ნებისმიერ ადამიანს ნებისმიერ დროს შეუძლია.
მნიშვნელობა არ აქვს, ვინ ხარ, რა შეგიძლია, ან რა გაგიკეთებია აქამდე. ახლა და ამ წამს შენც შეგიძლია ‒ აამო ღმერთს, თუკი შენს გულში ჩუმად წაიჩურჩულებ: „უფალო, შენთვის ცხოვრება მსურს.“
ნუ შეგაშინებს შენი გარემოება, პრობლემა, სტრესი თუ სხვა რამ. ერთი რამ დაიმახსოვრე, ყველაფერი დროებითია. ისწრაფე, რომ აამო ღმერთს.
შესაძლოა, ვინმე განიცდიდეს დეგრადაციის ერთ წუთს, მაგრამ დამერწმუნე, რომ თუკი იცხოვრებ იმისათვის, რომ უფალს აამო, ის ერთი წუთი შენთვის დიდების წუთი იქნება და არა მარცხის!
შენების და არა ნგრევის!
დაბრუნების და არა დაკარგვის!
დასაწყისის და არა დასასრულის!
