დეკემბერია…
მხრებზე ვიხვევ თბილ სამოსელს და დაორთქლილ მინებზე ათრთოლებული თითების მოკრძალებული გამბედაობით ვწერ – შობა…
ვუყურებ ცას და თავს ვაფარებ მის უმანკო გამომეტყველებას.
გათოვდეს ნეტავ…
ჰაერში სიხარულის მომგვრელი სურნელი ტრიალებს. საგულდაგულოდ დაწერილი სურვილების ბარათები ოცნებებად ავკინძე… გავგზავნი ღმერთთან.
ქუჩებში მოსაწყენი ხმაურია, აჩქარებული ნაბიჯებით ითელება დათოვლილი ბილიკები.
სუსხია და ცივა.
უიმედო კელაპტრები კიაფობს სევდაჩაგუბებული თვალების უპეებში…
ვერ ვისვენებ, ვფიქრობ…
იმედად მინდა მივიდე გამვლელებთან და ნანატრ სითბოდ მოვეხვიო: „ნუ დარდობ“ – ვუთხრა.
გილოცავ შობას, მეგობარო!
იესო იშვა!
მოიხსენი მხრებზე გადებული მძიმე ტვირთი, ახლოა შვება.
იპოვე მასში სიყვარული და ის შეავსებს შენში ბზარებად გაჩენილ სიცარიელეს და გაამთელებს ძლივს შეხორცებულ ნაიარევებს.
იესო იშვა!
და არ სჭირდება ამ თარიღს კალენდარზე ფანქრით მონიშვნა, რადგან სასწაულები კალენდრებით უფასურდება.
მხოლოდ დღეს არა, ყოველ დილით შევახსენოთ საკუთარ თავს მისი შობა და მივულოცოთ ერთმანეთს, რომ გვყავს იმედი, რომელიც არასოდეს არ გაცრუვდება.
სი-მარტო-ვე.
რა ცარიელი სიტყვაა…
ალბათ, სიმარტოვესაც გაბედვა უნდა…
შენთვის იშვა, შენთვის მოევლინა ტკივილით სავსე სამყაროს; გიპოვა, შეგიყვარა, მიგიღო, მეგობარი გიწოდა, გულში ჩაგიკრა; შენ კი, ადამიანო, გაირიყე, განაპირდი, შენს გზას დაადექი და განმარტოვდი, გტკივა…
ალბათ, გამოწვდილ ხელზე უარის თქმასაც გაბედვა უნდა…
მაგრამ ის გელოდება იმ ლოდინით, ადამიანებს რომ არ შეგვიძლია. ხელგამოწვდილი გელოდება, რომ მიგიღოს, გაპატიოს აკვიატებული სიმარტოვე და მისგან გაქცევა.
ნუ გაბედავ სიმარტოვეს!
მინდა, გავიდე ქუჩებში და მოურიდებელი სიხარულით ყველას შევაგებო სიტყვები:
„იესო იშვა, მეგობარო!“
შენთვის და ჩემთვის შეიმოსა მისი სპეტაკი სული უძლური ხორცით, რადგან ღმერთმა იმ სიყვარულით შეგვიყვარა, ადამიანებს რომ არ შეგვიძლია.
სიხარულით ივსება გული, რა საოცარი დღეა…
დაიბადა სინათლე, რომ გვეპოვა გზა, სადაც ჭეშმარიტება და სიცოცხლეა. მინდა, ჩვენი გულებიც ხელახლა დაიბადოს, წმინდა, სპეტაკი და უმანკო.
დაე, ჩვენს გულებში იშვას იესო!
მისი შობა არის დღესასწაული, დღე-სასწაული…
ეს დღე ერთადერთი დაბადების დღეა, როდესაც იუბილარს კი არა, ერთმანეთს ვულოცავთ მის დაბადებას.
გილოცავთ იესოს დაბადებას!
მისწერე ავტორს ფეისბუკზე