ნაიარევი, რომელიც არ გტკივა…
შენ გაქვს არჩევანი: შეგიძლია, შეინახო სიმწარე შენს გულში, დაადანაშაულო სხვები შენს უბედურებაში, ყოველღამე იფიქრო იმაზე, თუ რა დაგიშავეს, იტირო, შეიცოდო თავი და ეს პასუხისმგებლობა დააკისრო მათ, ვინც გატკინა, მაგრამ ამ ყველაფრიდან ერთადერთი დაზარალებული ადამიანი შენ იქნები…
რადგან ვისაც სტკივა, სწორედ მას შეუძლია, ატკინოს სხვას, ვინც სიმწარეს ინახავს, სწორედ მისი ცხოვრება განიცდის დეფორმაციას. ეს სიმწარე არ მოგცემს საშუალებას, შექმნა ბედნიერი ოჯახი, ჩამოაყალიბო კარგი ურთიერთობები, აღზარდო სუფთა გულის შვილები, ეს სიმწარე ყოველთვის შეგიშლის ხელს როგორც ღმერთთან, ისე ადამიანებთან ურთერთობაში, ვერ იპოვი ადგილს ღმერთში, რადგან დაწერილია: „ვინც არ მიუტევებს, არ მიეტევება“, და ვერ იპოვი ადგილს ადამიანებში, რადგან „ტკბილი“ ადამიანები „მწარე“ წყალს ერიდებიან. ამიტომ ერთადერთი დაზარალებული ადამიანი შენ იქნები.
პატიებას აქვს ერთი საოცარი ეფექტი, ის არის ნაიარევი, რომელიც აღარ გტკივა… ტკივილი, რომელიც სადღაც გაქრა… უყურებ, გახსოვს, შეგიძლია ‒ ხელით შეეხო, მაგრამ ვეღარ ახერხებს შენში ტკივილის გამოწვევას… ამას თავისუფლება ჰქვია…
გქონდეს პატიების უნარი ‒ ეს ნიშნავს, რომ დაამსხვრიო შენს ცხოვრებაში ყველა წინაღობა, რომელიც შენი ბედნიერი მომავლის გზას კეტავს.
თუ მართლა გსურს, იპოვო პატიების ძალა, მაშინ იცოდე, რომ არის პიროვნება, რომელმაც მოახერხა ეს ყველაზე რთულ სიტუაციაში… მაშინ, როდესაც ყველაზე მეტად სტკიოდა, ვინ მოახერხა მიტევება მათთვის, რომლებიც ყველაზე ნაკლებად იმსახურებდნენ ამას? ეს პიროვნება იესო ქრისტე იყო, და ის ჯვარზე ამბობდა: „მამა, მიუტევე, რადგან არ იციან, რას აკეთებენ.“
მოუხმე იესოს, რომ გასწავლოს პატიება, რომელსაც მოაქვს თავისუფლება, კურნება და იმედით სავსე მომავალი შენთვის!
კოლ. 3:13
„შეიწყნარეთ ერთიმეორე და მიუტევეთ ერთმანეთს, თუ ვინმესთან რაიმე სადავო აქვს ვინმეს: როგორც ქრისტემ მოგიტევათ, თქვენც ასევე მიუტევეთ.“
