მალე უფალი გოლგოთას შეუდგება…
მალე დადგება ღამე ზიარებისა, საიდუმლო სერობისა, ერთობისა და ახალი აღთქმისა, რომელზეც უფალი იტყვის: „ეს არის ჩემი სისხლი ახალი აღთქმისა, მრავალთათვის დაღვრილი.“ პურის დამტვრევისა და სისხლისფერი ღვინის თასში ჩამოსხმის ხმა გამოსყიდვის მახარობლად მოევლინება კაცობრიობას.
მალე დადგება ღამე ლოცვისა სისხლის წვეთებით დაცვარული… მხურვალე ლოცვანი დროის სარტყელს გადაკვეთენ და უსასრულობაში გაიჭიმებიან, 2000 წელს კრიალოსანივით დამარცვლავენ ბაგენი და იქცევიან კურთხევად ჩვენი ცხოვრებისათვის.
მალე დადგება ღამე გაცემისა, ღალატის სუნით გაჟღენთილი გეთსიმანიის ჰაერი ჩვენამდეც მოაღწევს და შიგნეულს ჩაგვწვავს. საკუთარ თავთან გარინდებულნი იუდას ამოვიცნობთ ჩვენი სულის ბნელ კუნჭულში მიყუჟულს და გვეტკინება… ვიტირებთ და მონანიების ცრემლები გოგლგოთისკენ გაგვიძღვება.
მალე დადგება დღე, სადაც სასამართლოში დააყენებენ სამყაროს უზენაეს მოსამართლეს, უბრალოში იპოვიან ბრალს და უცოდველს ცოდვილად შერაცხავენ. იყვირებენ: „მოგვეცი ბარაბა!“ და „ჯვარს აცვი იგი!..“ ბრბოს დამაყრუებელი ძახილი დროსა და სივრცეს დასძლევს და მრავალს დააყრუებს ადამის ძეთაგან. წყლის ხმაური კი მოსამართლის ხელებს რომ სიბილწეს ჩამოჰბანს, ჩვენთვის იქნება შეხსენებად, რომ ჩვენ ნაცვლად გასამართლდა ‒ უბრალო ბრალიანთათვის.
მალე დადგება დღე, მოქნეული შოლტის სიმძიმე, რომ გაკვეთს ზეცას. ქმნილებანი შემოქმედს აწამებენ, ხორცს დაუგლეჯენ და წილს ყრიან მის სამოსელზე. სისხლის სუნი ჩვენამდეც მოაღწევს და ჩვენთვის დაღვრილი წმინდა სისხლის მადლი სამყოფი იქნება მთელი კაცობრიობისათვის…
მალე დადგება დღე, კაცთა მიერ ნაწამები უფალი რომ გოლგოთას შეუდგება. ჯვრის სიმძიმით გამოწვეული დაცემა ფეხქვეშ მიწას შეძრავს. ეკლიანი გვირგვინით გამოწვეულ ტკივილნარევ გმინვას ბებერი ქარი მოიტანს ჩვენამდე და ძვალსა და რბილში გაგვატანს ჩვენი გულგრილობით გამოწვეული სიცივე. იმ დღეს წყალს ძმრის გემო ექნება… იმ დღეს ნაადრევად დაბნელდება… იმ დღეს სამყარო ჩაიცვამს ძაძებს, როგორც ადამიანისგან ნაწამები ღმერთის ჭირისუფალი. იმ დღეს კრეტსაბმელი ჩაიხევა და იძვრება მიწა…
იმ დღეს მარადისობას შეარყევს სულის შემძვრელი ძახილი: „ღმერთო ჩემო, ღმერთო ჩემო, რად მიმატოვე?!“ და მძიმე იქნება ქრისტეს უკანასკნელი ამოსუნთქვის ატანა მატერიისთვის.
მალე დადგება დღე, როცა ანგელოზი გადააგორებს ლოდს და კაცობრიობას დარჩება ცარიელი საფლავი, სამახსოვროდ იმისა, რომ იესო ქრისტეა აღდგომა და სიცოცხლე!
მაგრამ მანამდე უფალი გოლგოთას შეუდგება.
მალე უფალი გოლგოთას შეუდგება…
მიჰყევი მის ნაკვალევს!
„ჩემს თავს განვწმენდ მათთვის, რათა ისინიც განწმენდილნი იყვნენ ჭეშმარიტებით. მხოლოდ ამათთვის არ გთხოვ, არამედ იმათთვისაც, ვინც მათი სიტყვით მირწმუნებს.“ (იოანეს 17:19-20).
