ჩემს თავზე ვიტყვი, ბავშობიდან მოყოლებული სულ ვცდილობ, ვინმეს მივბაძო.
მულტფილმის გმირები, უფროსკლასელები, საყვარელი მსახიობები, უბნის ავტორიტეტები, მომღერლები, სპორტსმენები, ადამიანები, რომელთა გარეგნობით, ჩაცმის სტილით, ვარცხნილობით თუ სიტყვა–პასუხით მოხიბლულნი ვართ და ვცდილობთ, მათნაირები ვიყოთ.
როგორც ქრისტიანისთვის, ჩემთვის გასაგებია, რომ ყველა ადამიანი არის უნიკალური და შეუდარებელი ქმნილება, მაგრამ დღესაც არიან ადამიანები, რომელთაც ვბაძავ და ისინი ჩემთვის ავტორიტეტები არიან.
პავლე მოციქული წერს:
1 კორინთელთა 11:1: „მე მომბაძეთ, როგორც მე ვბაძავ ქრისტეს.“
ებრაელთა 6:12: „რათა არ გაზარმაცდეთ, არამედ მიჰბაძოთ მათ, ვინც რწმენითა და სულგრძელობით იმკვიდრებს აღთქმებს.“
რეალურად, არ არსებობს ადამიანი, ვისაც არასოდეს მიუბაძავს ვინმესთვის და არც წმინდა წერილი არის მიმბაძველობის მოწინააღმდეგე, მაგრამ იგი მიგვითითებს, თუ ვის უნდა მივბაძოთ.
ის, თუ ვინ ვიქნები მე ხვალ, დამოკიდებულია იმაზე, თუ ვის მივბაძავ და მოვუსმენ დღეს.
გული მწყდება, როდესაც ვხვდები ეკლესიის მოზარდებს და ახალგაზრდებს, რომლებიც ჰბაძავენ, შესაძლოა, კარგ ადამიანებს, მაგრამ არა ქრისტიანებს, რომელთათვისაც უპირატესია ქრისტიანული ფასეულობები.
ჩემთვის რთული იქნებოდა სულიერად ზრდა, თუ არ მეყოლებოდა სწორი ავტორიტეტები... მე არ ვამბობ, რომ ვინმე უნდა გახდეს ჩვენთვის კერპი და ღმერთი უნდა ჩავანაცვლოთ, რა თქმა უნდა, ღმერთი უმაღლესი ავტორიტეტია, მაგრამ გულწრფელი ვიქნები და ყოველთვის არ ვარ ისეთ სულიერ განწყობაზე, რომ ღვთის ხმა ვისმინო, სამაგიეროდ, ყოველთვის შემიძლია, დავურეკო ჩემს სულიერ ავტორიტეტებს და ვკითხო რჩევა ნებისმიერ საკითხზე.
მიჰბაძე და უსმინე მათ, რომელთაც აქვთ რწმენის საქმეები, ვისთვისაც ფასეულია ეკლესია, ვინც ფასის გადამხდელნი არიან რწმენის გამო და რომლებსაც უყვართ ღმერთი და ადამიანი.
ასე შესაძლებლობა გეძლევა, რომ ერთ დღეს შენც გახდე სხვებისთვის მისაბაძი პიროვნება.
უფალმა გაკურთხოს!
