თუ დაგიგდია სიჩუმისათვის ოდესმე ყური ამ ხმაურით გაჟღენთილ ატმოსფეროში, რათა მეტის მოსმენა შეგძლებოდა?
თუ დაგიხუჭავს ოდესმე თვალები, რათა შეგძლებოდა მეტის დანახვა?
თუ შეჩერებულხარ, თუ დაგიხევია ოდესმე უკან, რათა უფრო წინ წასვლის ძალა მოგცემოდა?
თუ დადუმებულხარ ოდესმე, რათა უფრო მრავლისმთქმელი ყოფილიყავი?
თუ შეგიკავებია ბაგე, თუ გადაგიყლაპავს ოდესმე სიტყვა, რათა შენს სიბრძნეს ელაპარაკა?
თუ დაგიკარგავს ოდესმე ეგო, რათა გეპოვა მოყვასი?
თუ გიმჯობინებია ზარალი საკუთარი, ვიდრე ზარალი ძმისა?
თუ წაგიგია ოდესმე კამათი მეგობრის მოგების სანაცვლოდ?
თუ გამოცლილხარ ადამიანს გვერდიდან, რათა მისდამი ერთგულება დაგემტკიცებინა?
თუ წამოსულხარ ოდესმე, რათა შენი იქ ყოფნა უფრო ფასეული ყოფილიყო?
თუ გითქვამს თავის მართლებაზე უარი, რათა მტკიცედ დაგეცვა შენი სიმართლე?
თუ გითქვამს უარი ბრძოლაზე, რათა ომის მოგების შესაძლებლობა გქონოდა?
თუ მიშტერებიხარ ღამის ცას მეტი სინათლის დასანახავად?
თუ გაგისწორებია თვალი ჰორიზონტისთვის მარადისობის ამოსაცნობად?
თუ დაკვირვებიხარ თავს სარკეში მთელი სამყაროს დაკვირვების მიზნით?
თუ გიტირია ხმამაღლა, რათა სიხარული გამოგეხატა?
თუ ჩაგიყრია მიწაში, რათა აღმოცენებულით გეხარა?
თუ დაღლილხარ ბაღის მოვლისას, რათა მისი ნაყოფით მოგესვენა?
თუ გაგიცია ოდესმე, რათა მეტი დაგრჩენოდა?
თუ გითქვამს ოდესმე უარი ფულზე, რათა მეტი სიმდიდრე შეგეძინა?
თუ დაგინთია ოდესმე ცეცხლი სხვისი გათბობის მიზნით?
თუ მოგიმზადებია ოდესმე საჭმელი სხვის დასაპურებლად?
თუ ყოფილხარ ოდესმე უკანასკნელი, რათა შეგძლებოდა, პირველი ყოფილიყავი?
თუ გიქცევია ზურგი რელიგიისთვის, რათა ღმერთისგან არ მდგარიყავი ზურგით?
თუ დაშორებულხარ ოდესმე „ქრისტიანობას“, რათა ქრისტეს მიახლოვებოდი?
თუ მიწვდენილხარ მუხლებით მიწას, რათა შეგძლებოდა, ზეცას მისწვდომოდი?
თუ გილოცია ოდესმე უხმოდ, რათა შენი ლოცვა ხმამაღალი ყოფილიყო?
თუ დაგიმდაბლებია ოდესმე თავი, რათა შესძლებოდა ღმერთს შენი ამაღლება?
თუ გითქვამს საკუთარ ნებაზე უარი, რათა შეგესრულებინა ნება უფლისა?
თუ მჯდარხარ ოდესმე ცარიელ ფურცელთან სავსე გულის გადმოსაღვრელად?
თუ დაგიტოვებია კითხვა უპასუხოდ, რათა პასუხი ნათელი ყოფილიყო?
