ფიზიკურ სამყაროში გამოვლინებამდე, ქმედება გადის პროცესს, რომელიც მიმდინარეობს ადამიანის გონებაში, უფრო კონკრეტულად კი, ფიქრებში. იგი ორი ძირითადი ეტაპისგან შედგება:
1. ჩასახვა – იბადება ფიქრი მოქმედების განხორციელების შესახებ.
2. გადაწყვეტილება – განხორციელდეს თუ არა ეს ქმედება.
ბიბლია ამბობს, რომ ყოველი ქმედება, ანუ ადამიანის ყოველდღიური ცხოვრების სტილი, განსაზღვრავს იმას, თუ რა დაემართება მის სულს სხეულის სიკვდილის შემდეგ:
ვინაიდან ჩვენ, ყველანი უნდა გამოვცხადდეთ ქრისტეს სამსჯავროს წინაშე, რათა თითოეულმა მიიღოს იმის მიხედვით, რასაც სხეულის სიცოცხლის დროს აკეთებდა – კეთილს თუ ბოროტს.
მე, როგორც ქრისტიანი, ამ სიტყვების ჭეშმარიტებაში მტკიცედ ვარ დარწმუნებული!
სულისთვის ორი ადგილსამყოფელი არსებობს: სამოთხე და ჯოჯოხეთი.
სამყაროში ორი მხარეა: კეთილი და ბოროტი, ღმერთის და ეშმაკის.
ორივე მხარე იბრძვის ადამიანის სულისათვის. ღმერთი იბრძვის, რომ ადამიანის სული გადარჩეს და საუკუნო სიცოცხლე დაიმკვიდროს; ხოლო ეშმაკი იბრძვის, რომ ადამიანის სული დაღუპოს და მარადიულ სატანჯველში გაგზავნოს. ეს ბრძოლა ჩვენს გონებაში, კერძოდ კი, ფიქრებში მიმდინარეობს.
ის, თუ ვინ გაიმარჯვებს ამ ბრძოლაში, დამოკიდებულია იმაზე, თუ რომელ მხარეს (უფალს თუ ეშმაკს) მოუსმენს ადამიანი, რომლის გონებაშიც მიმდინარეობს ეს ომი!
უფალი მრავალგან გვაფრთხილებს იმის შესახებ, თუ რამდენად მნიშვნელოვანია – ვაკონტროლებდეთ იმას, თუ რაზე ვფიქრობთ!
ჩვენი ფიქრები ქმედებებად იქცევა!
მინდა, ერთი ციტატა გაგიზიარო ბიბლიიდან, რომელიც დაგეხმარება იმაში, რომ დაიცვა თავი ბოროტის მიერ მოტანილი ფიქრებისაგან, რათა ისინი არ იქცნენ შენს ქმედებებად.
და ბოლოს, ჩემო ძმებო, ყოველივე, რაც ჭეშმარიტია, რაც პატიოსანია, რაც მართალია, რაც უმანკოა, რაც საყვარელია, რაც სასახელოა, ყოველივე, რაც მოსაწონი და სანაქებოა, იმაზე იფიქრეთ.
ეს მუხლი გვიჩვენებს რვა ფილტრს, რომელშიც უნდა გაიაროს შენს გონებაში არსებულმა თითოეულმა ფიქრმა.
• რა დანიშნულება აქვს ფილტრს?
თვალსაჩინოებისთვის წარმოიდგინე მილი, რომელშიც დასალევმა წყალმა უნდა გაიაროს, ამ მილს უმონტაჟებენ ფილტრს, რომელიც წყალში არსებულ სიბინძურეს შეაკავებს და წყალს დასალევად ვარგისს გახდის, მაგრამ თუ ფილტრი არ იქნება დამონტაჟებული, წყალი არ გაიწმინდება და მის დამლევს დააზიანებს.
აი, ასე მოქმედებს ფილტრი და ამისათვის სჭირდება ჩვენს ფიქრებსაც ის!
ეშმაკი ეცდება, ბოროტი ფიქრებით „დაბომბოს“ შენი გონება, ფიქრებით, რომლებიც შენი სულის დაღუპვას ემსახურება, მაგრამ შენ თუ ფხიზლად იდგები და ამ ფიქრებს გაფილტრავ, ბოროტი ვერ შეძლებს თავისი განზრახვის აღსრულებას!
როდესაც ფიქრი დაიბადება შენს გონებაში, დასვი შეკითხვა?
ის, რაზეც ახლა ვფიქრობ:
1. ჭეშმარიტია? (ჭეშმარიტებასთან, ღვთის სიტყვასთან თანხვედრილია?)
2. პატიოსანია? (კეთილსინდისიერი, სამართლიანი, ღირსეული, წესიერია?)
3. მართალია? (მორალურად სწორი, სამართლიანია?)
4. უმანკოა? (წმინდაა თუ უწმინდური?)
5. საყვარელია? (მოსაწონი და სიყვარულის ღირსია?)
6. სასახელოა? (დიდების ღირსია?)
7. მოსაწონია? (მოსაწონია უფლისათვის?)
8. სანაქებოა? (უფლისგან საქებარია?)
მაშ ასე, ბოლოს მსურს, წარმატება გისურვო ამ ბრძოლაში და რამდენიმე ამონარიდი შეგახსენო ბიბლიიდან, რომელიც დაგეხმარება გამარჯვებაში:
რადგან ხორციელი ფიქრები სიკვდილია, ხოლო სულიერი ფიქრები – სიცოცხლე და მშვიდობა. იმიტომ, რომ ხორციელი ფიქრები ღვთის მტრობაა; ვინაიდან არ ემორჩილება ღვთის რჯულს და არც შეუძლია.
ზეციერზე იფიქრეთ და არა მიწიერზე.
და ღვთის მშვიდობა, რომელიც ყოველგვარ გონებას აღემატება, დაიფარავს თქვენს გულებს და თქვენს ფიქრებს ქრისტე იესოში.
გამარჯვებულ ცხოვრებას გისურვებ!
