ერთი წინადადებით რომ შეგეძლოთ მადლიერების გამოხატვა სამყაროს წინაშე, რას დაწერდითო, მკითხეს.
იმას, რასაც ვფიქრობდი და ვგრძნობდი, როგორ ჩავტევდი ერთ წინადადებაში, არ ვიცოდი.
ეს მართლაც წინადადებაზე დიდი იყო, ეს მსჯელობა და ფიქრი გახლდათ საკუთარ თავთან.
ჩემთვის ეს სამყარო სწორედ ისეთი აღმოჩნდა, რომ მე შემძლებოდა, მეპოვა ჩემი თავი; დამენახა, როგორი ვარ რეალურად, რა შემიძლია, რა დროს რას გავაკეთებ და ზოგადად, რის გაკეთება შემიძლია ამა თუ იმ სიტუაციაში.
ამ სამყაროში მე შემეძლო მტკენოდა, მეტირა, მეყვირა, მეცინა, მეგრძნო, მეფიქრა, მებრძოლა, გამემარჯვებინა, მეზეიმა! – ამ და სხვა ბევრ რამეში მე ამ სამყაროში დავინახე ჩემი ძლიერი და დადებითი, და ასევე, სუსტი და მანკიერი მხარეები.
პირველი ადამიანები დიდებულ ადგილზე იმყოფებოდნენ, დიდებულ ღმერთთან, სადაც ვერ დაინახეს საკუთარი თავი, ვერ იკმარეს ის დიდებულება, ის სივრცე, ის სამყარო…
ყოველთვის ვგრძნობ, რომ აქაურობა ჩემთვის თითქოს არ არის ის კომფორტის ზონა, თუმცა მე აქ ვიპოვე ღმერთი; სწორედ აქ შევიყვარე ის; სწორედ ეს იყო ის ადგილი, სადაც ავირჩიე იგი!
სწორედ აქ გავიცანი და შევიყვარე საკუთარი თავი; აქ მივიღე ჩემი „მე“; აქ გავაანალიზე, რომ მჭირდებოდა – მიმეღო უფალი ჩემს პირად მხსნელად; აქ მოვიდა ქრისტე ჩემს გადასარჩენად; სწორედ აქ დაიღვარა სისხლი ჩემი ცოდვებისთვის და მეც სწორედ აქ გამიჩნდა სურვილი ღმერთის განდიდების. სწორედ ამიტომ ვცდილობ, საკუთარი თავი გავხადო ისეთი, რომ დავბრუნდე იქ, სადაც უნდა ვიყო…
სწორედ ამიტომ, მადლობა ამ სამყაროს, რადგან ის არის ჩემთვის, როგორც ღმერთისგან ბოძებული შესაძლებლობა, რათა საკუთარი ნებით ავირჩიო, რა მინდა, ვის მინდა გავყვე, როგორი მინდა ვიყო, ვის ვემსახურო, ამიტომ მადლობა ამ ყველაფრისთვის.
ვფიქრობ, ეს სამყარო, რაც არ უნდა ცუდი იყოს, ჩემს შემთხვევაში, მაინც დიდებულია თავის თავში და სწორედ ამ სამყაროში დევს გარკვეული სიბრძნეც და სიღრმეც.
ის თავის მისიას ასრულებს, ჩვენ კი ყოველდღიურ არჩევანს ვაკეთებთ.
P.S. გამარჯობა, სამყაროვ! ვაპირებ, საკუთარი თავით გაგალამაზო. ^_^ 
რამდენად ლამაზიც ვიქნებით მე და შენ (არა ხორციელად, არამედ სულიერად), იმდენადვე გალამაზდება სამყაროც, რადგან ჩვენ ვიქნებით ნათელი ამ სამყაროში.
კოლ. 3:4-5: „როდესაც გამოჩნდება ქრისტე, თქვენი სიცოცხლე, მასთან ერთად თქვენც გამოჩნდებით დიდებით. მაშ, მოაკვდინეთ თქვენი მიწიერი ასოები: სიძვა, უწმინდურება, ვნება, ბოროტი გულისთქმა და ანგარება, რაც კერპთმსახურებაა.“
ეს ჩვენი ბრძოლაა, ეს ჩვენი არჩევანი და გადაწყვეტილებაა!
კოლ. 3:12-14: „ამიტომ, როგორც ღვთის რჩეულებმა, წმინდებმა და საყვარლებმა, შეიმოსეთ მოწყალება, სახიერება, თავმდაბლობა, სიმშვიდე, სულგრძელობა. შეიწყნარეთ ერთიმეორე და მიუტევეთ ერთმანეთს. და ყოველივე ამას დაურთეთ სიყვარული, რომელიც ყველაფერს აკავშირებს და სრულყოფს.“
მიყვარხართ!..
მისწერე ავტორს ფეისბუკზე