ბოლო პერიოდში დიდი პოპულარობით სარგებლობს ჰოროსკოპი, ასტროლოგია, მკითხაობა და ჯადოქრობა. ადამიანებმა შეწყვიტეს ლოცვა და დაიწყეს შელოცვა; ადამიანებმა შეწყვიტეს საკუთარი დანიშნულების ძიება ღმერთის სიტყვაში და დაიწყეს მომავლის მკითხაობა.
ბიბლიურმა ღმერთმა ადამიანი შექმნა ყველანაირ შემოქმედებაზე ამაღლებულ და თავისუფალ ქმნილებად, რომელსაც აქვს პრივილეგია ღმერთთან ცოცხალი ურთიერთობის, ცხოვრებისეული აზრის და დანიშნულების მისგან კარნახის და მისგან მოსმენის. ამიტომ ასტროლოგიისადმი ნდობა პირდაპირ ამცირებს ადამიანის ფასეულობას და როლს.
ეს იმ ადამიანთა მოგონილი მეცნიერება და ალტერნატივაა, რომელთაც სწყურიათ უსაფრთხოების განცდა, მომავლის გარანტია, მაგრამ არ სურთ ბიბლიურ ღმერთთან კავშირი. რა თქმა უნდა, ეს თვითმოტყუება და ამაო დაჯერებაა, რაც ვერ დაიცავს ადამიანს იმ სულიერი საფრთხისგან, რომელიც არსებობს.
ღვთის სიტყვას აქვს მკაფიო მიზანი, დააკავშიროს ადამიანი თავის შემოქმედთან. იესო ქრისტე ყველა ადამიანის მხსნელია და მხოლოდ მისი რწმენა, მისადმი მიძღვნა ამყოფებს კაცს უსაფრთხოდ. სხვა ყველაფერი თავის მოტყუება და საკუთარი გზების ძიებაა.
სხვათა შორის, საღვთო წერილი დასცინის ამ მეცნიერებას, როგორც უძლურ ალტერნატივას ბოროტების და ტანჯვის წინააღმდეგ…
იხილეთ ტექსტი ქვემოთ:
„მოგეწევა ბოროტი და არ გეცოდინება, როგორ შეულოცო; დაგატყდება უბედურება და ვერ შეძლებ მისგან გამოსყიდვას; ისე მოულოდნელად მოგივა წარწყმედა, რომ ვერც მიხვდები. დარჩი ახლა შენს ჯადოსნობასა და მრავალ გრძნეულებაში, რაზეც სიყმაწვილიდან ზრუნავდი; იქნებ მიიღო სარგებელი, იქნებ შიში მოჰგვარო ხალხს. დაქანცული ხარ მრავალი რჩევისგან; ახლა ადგნენ და გიხსნან ცის მზომლებმა და ვარსკვლავთმრიცხველებმა, ახალმთვარეობისას რომ წინასწარმეტყველებენ და გეუბნებიან, რა მოგივა. აჰა, ბზესავით გახდნენ, ცეცხლმა დაწვა ისინი, ვერ გადაირჩინეს სული ალისგან; არ დარჩა ნაკვერჩხალი გასათბობად, ცეცხლი – მის წინ დასაჯდომად. ასეთები გახდნენ შენთვის ისინი, ვისთვისაც იღვწოდი, ვისთანაც შენი სიყმაწვილიდან ვაჭრობდი; თითოეული თავის მხარეს წაჩანჩალდა, არავინაა შენი მხსნელი!“
