ხშირად ვლოცულობ შემდეგი სიტყვებით:
– უფალო, გამოავლინე შენი ნება; მიჩვენე, რა არის შენთვის სასურველი, რომ სწორად და გონივრულად ავირჩიო ყოველივე.
და მივხვდი, რომ:
რაც უფრო აგვიანებ ღმერთთან ურთიერთობას, მით უფრო გვიანდება შენს ცხოვრებაში მისი ნების გამოვლენა.
ხშირად წარმატებისა და ჩვენი ცხოვრების გზების სასიკეთოდ წარმართვის მოლოდინი ხდება რუტინული.
ველოდებით, მაგრამ არ ვლოცულობთ რწმენით;
ველოდებით, მაგრამ არა – იმედით.
საბოლოოდ, პრობლემები რჩება პრობლემებად, ყოველივე ამას კი მოსდევს იმედგაცრუება.
გვინელდება იმის რწმენა, რომ უფალს აქვს ჩვენზე სასიკეთო ჩანაფიქრი და გეგმა.
მიფიქრია, ასეთ დიდებულ ღმერთს ათასობით ადამიანში ჩემზე, ერთ ჭიანჭველათაგანზე, ასეთ მცირეზე როგორ უნდა ჰქონდეს გეგმა?
გავიხსენოთ მოსე, სანამ ცეცხლმოკიდებულ ბუჩქს ნახავდა და ღმერთი მოუწოდებდა, რომ ერს გასძღოლოდა. მას ფიქრადაც არ გაუვლია, რა ჰქონდა დაგეგმილი ღმერთს.
დავითი, მწყემსი ბიჭი, უფლისგან იყო მეფედ ცხებული. ალბათ, ერთ-ერთი უკანასკნელი იყო, ვისაც ხალხი მეფედ აირჩევდა, მაგრამ ღმერთმა იგი თავისი ხალხის წინამძღოლობისთვის გამოიყენა.
პავლე მოციქული, ერთ დროს ქრისტიანების მდევნელი, ქრისტიანობისკენ მომწოდებელი გახდა.
ღმერთს აქვს სასიკეთო ზრახვები, მაგრამ ზოგჯერ ჩვენ არ ვაძლევთ ყოველივე ამის გამოვლენის საშუალებას და საკუთარი ძალისხმევით ვცდილობთ გარკვეული საკითხების გადაწყვეტას.
უფალი გვესაუბრება, ჩვენ კი გვჭირდება მისი ხმის გარჩევისა და მოსმენის სწავლა.
ადამიანის ცხოვრებაში არის ეტაპები, როდესაც მნიშვნელოვანი გადაწყვეტილებებია მისაღები.
სთხოვე უფალს, რომ გიჩვენოს სწორი გზები.
ამ გზების დანახვა შესაძლებელია უფალთან გამუდმებული, ერთგული ურთიერთობით;
დაჟინებული რწმენითა და მოლოდინით.
დღევანდელი ქარიშხლიანი დღე მხოლოდ წვრთნაა.
გლოვის ველის მოთმინებითა და მორჩილებით გავლა შენს ცხოვრებაში მოიტანს წყაროს წყალს და ნანატრ შვებას.
„ყოველივე სიხარულად ჩათვალეთ, ჩემო ძმებო, როცა სხვადასხვა განსაცდელში ცვივდებით, რაკი იცით, რომ თქვენი რწმენის გამოცდა მოთმინებას ქმნის.“
უდაბნოს გადიხარ?
მადლიერებითა და რწმენით იარე და მიიღებ უფლისგან აღთქმულს!
უდაბნოს ბოლოს უფალი მოგცემს გამარჯვებას, რომელზეც, შესაძლოა, არც კი გიოცნებია, რადგან ხშირად ჩვენი ფიქრი ვერც კი სწვდება უფლის ჩანაფიქრს.
შეებრძოლე იმაზე ფიქრს, რომ გამოსავალი არ არსებობს, რადგან უფალი ამბობს:
„ნუ გეშინია, რადგან შენთან ვარ, ნუ ფრთხი, რადგან შენი ღმერთი ვარ, განგამტკიცებ, შეგეწევი და მხარს დაგიჭერ.“
რა სჭირდება უფალს შენგან?!
ერთგულება!
„შეიყვარეთ უფალი, ღვთისნიერნო მისნო; ერთგულს იცავს უფალი.“
დღეს არის დრო, რომ მეტად მიუახლოვდე და მიჰყვე მას.
ერთგული ურთიერთობა ღმერთთან გიჩვენებს გზებს, რომლებიც უნდა აირჩიო და გასწავლის კიდეც მათზე სიარულს.
ყველას გვიყვარს მადლიერი ადამიანი.
ღმერთიც მცირედით მადლიერს უხვ კურთხევას და წყალობას უვლენს.
გახსოვდეს, რა გააკეთა უფალმა დღემდე შენთვის!
გახსოვდეს, რისგან გიხსნა და დაგიცვა, სად გიპოვა, საიდან გამოგიყვანა და სად დგახარ დღეს!
ხშირად უხილავისგან გვიცავს უფალი.
თუ შენ დღეს გადიხარ უდაბნოს და თითქოს ამ ყველაფერს არ უჩანს ბოლო, იცოდე:
რაც უფრო აგვიანებ ღმერთთან ურთიერთობას,
მით უფრო გვიანდება მისი ნების გამოვლენა შენს ცხოვრებაში,
მით უფრო გვიანდება ღმერთისგან აღთქმულის მიღება!
გახსოვდეს მადლიერება ყველაფრისთვის!
