გიმღერია ტკივილის დროს ისე, თითქოს ყველაზე ბედნიერი ადამიანი ხარ ამ სამყაროში?
ან გიცეკვია თავსხმა წვიმაში ისე, თითქოს ირგვლივ მხოლოდ შენ ხარ?
გიგრძნია თავი ყველაზე მარტოსულ ადამიანად ამ სამყაროში მაშინაც კი, როდესაც ირგვლივ ათობით ან ასობით ადამიანი გაკრავს გარს?
განგიცდია სულის ტკივილი იქამდე, თითქოს გულზე ხელის მიბჯენით შეგიძლია, ხელი ჩასჭიდო ტკივილს და საბოლოოდ მოიგლიჯო სხეულიდან?
ან თუ გიტირია მწარე ცრემლით იქამდე, ვიდრე ღონემიხდილსა და ძალაგამოცლილს ძილის მეტი არაფერი შეგძლებია?
გყვარებია სხვა საკუთარ თავზე მეტად?
გაგინაწილებია სხვისთვის ის, რაც ყველაზე მეტად გნდომებია?
უღალატია შენთვის იმ ადამიანს, რომელზეც ფიქრობდი, რომ საკუთარ სულსაც კი ანდობდი?!
წაურთმევიათ შენთვის ოცნება, რომელიც დიდი მოტივაცია იყო შენთვის?
განგიცდია მომენტი, როდესაც სიკეთის წილ უსაზღვრო სიბოროტეს გიბრუნებენ უკან?
ერთხელ მაინც გაუმწარებიხარ კითხვას: „რატომ?!“ და პასუხი დღემდე არ მიგიღია?
ერთხელ მაინც გაგცრუებია იმედი ისე, თითქოს გამოსავალი უფსკრულის პირას გაქცევა და სამუდამო სიბნელესთან შეერთება ყოფილიყოს?
ერთხელ მაინც დაკარგულხარ საკუთარ თავში ისე, თითქოს სულ სხვა ადამიანად იქეცი?!
ერთხელ მაინც დაცემულხარ ისე, თითქოს იმედის ბოლო ნაპერწკალიც სიბნელეს ჩაეყლაპოს?
ერთხელ მაინც გიყვირია სიტყვა „კმარა!“ ისე, რომ საკუთარი თავის თავადვე შეგშინებია?
შეგშინებია საკუთარი თავის მაშინ, როცა ირგვლივ ყველაფრის განადგურების სურვილი გაგჩენია?
გიგრძნია შურისძიების წყურვილი ისე, თითქოს სისხლი გაგყინვია?
ერთხელ მაინც შეგშლია ის, რაც გეგონა, რომ არასდროს შეგეშლებოდა და შეგმთხვევია ის, რაზეც ფიქრობდი, რომ შეიძლება სხვას, მაგრამ შენ არ შეგემთხვეოდა?
ან ერთხელ მაინც გითქვამს სასოწარკვეთილს ფრაზა: „რატომ მაინცდამაინც მე?!“
თუ ამ ყველაფერთაგან რაიმე შეგმთხვევია, გილოცავ!
კეთილი იყოს შენი დედამიწაზე ცხოვრება!
ერთხელ მაინც დაფიქრებულხარ, რომ ცხოვრებაა ზუსტად ამ შემთხვევებით სავსე?! და მეტიც! არაფერია ამ დედამიწაზე შემთხვევითი.
და ჯერ კიდევ სად ხარ!
წინ კიდევ მრავალი გამოწვევაა…
და თუ ერთხელ მაინც გიგემია ტკივილის შემდგომ ზეიმის გემო, აუცილებლად აირჩევ გამარჯვების გზას! რადგან შემთხვევით არ ხდება არაფერი. ეს ყველაფერი ხდება იმისთვის, რომ ისწავლო ნამდვილი ბრძოლა; გაიგო, რა გემო აქვს სიკეთეს და რა – ბოროტებას. გადააფასო პრიორიტეტები და გაფილტრო შენ ირგვლივ ყველა სულიერი და უსულო რამ, რა არის სასარგებლო და რა – მავნე.
იბრძოლე იქამდე, სანამ ერთხელ მაინც შეგიძლია, ღრმად ჩაისუნთქო…
იბრძოლე მანამ, სანამ ამის ძალა შეგწევს!
დაიწყე მოქმედება ახლა და არ გადადო ხვალისთვის!
იმოქმედე დროულად და ნუ დააყოვნებ!
რადგან დრო მიდის, მას ვერ შეაკავებ, ვერც ერთ დღეს ვერ ეტყვი, აქ მოიცადე, მალე დავბრუნდებიო!
განუწყვეტლივ იყავი მზად კეთილი საქმეების საკეთებლად.
იცოდე, რომ ყველაფერი, რაც შენ ირგვლივ ხდება, არ არის სამყაროსთვის უცხო.
„არის რაღაც, რომ იტყვიან მასზე: ‘შეხედე, ახალია ეს!’ ის კი უკვე ყოფილა საუკუნეებში – ჩვენამდე რომ იყვნენ.“
მზად ხარ?!
