უდაბნო უსაშველოდ ცხელია, ალაგ-ალაგ ქვიანი და მშრალი, პეიზაჟს გაჰყურებს და მისი თვალები ცეცხლმოკიდებული მიწის ალმურს სარკესავით ირეკლავს, მის სანდლებში ცხელი ქვიშის მარცვლები აღწევს, სხეული გაუწყლოებას ებრძვის, კანი ტყავივითაა გადაკრული სახეზე, ტუჩები გასთეთრებია, ხოლო ეშმაკი, სადღაც ყურთან, გესლიანად ჩურჩულებს: „თუ ღმერთის ძე ხარ, უთხარი ამ ქვას, რომ პურად იქცეს.“ ის კი პასუხობს: „დაწერილია: ‘არა მხოლოდ პურით ცოცხლობს ადამიანი, არამედ ღვთის ყოველი სიტყვით.’“
დღეები გადის, ის მტკიცეა, თუმცა დაღლილი და ჭუჭყიანი. ოფლის წვეთებით დაცვარულ შუბლს ნაცრისფერი დასდებია მტვრისაგან… ემზადება ტანჯვისთვის ადამიანებისგან და ადამიანებისთვის, რომელთაგან მრავალი არ ირწმუნებს მის სახელს. და კვლავ ესმის ლუციფერის ჩურჩული ყურთან: „თუ თაყვანს მცემ, შენი იქნება ყოველივე!“ ის კი პასუხობს: „დაწერილია: ‘უფალს, შენს ღმერთს, ეცი თაყვანი და მხოლოდ მას ემსახურე.’“
დღეს ღამე ცვლის, მზეს – მთვარე, უსაშველო სიცხეს – უსაშველო სიცივე. თვეზე მეტია, არ უჭამია, ნორმალურად არ სძინებია, მოსვენებით არ ჩამომჯდარა, არ უნახავს ოჯახი, მეგობრები… უდაბნოში მთელი სიმძაფრით აცნობიერებს მომავალ ტანჯვას და კაცობრიობის გადარჩენის აუცილებლობას, რომლის ერთადერთი გზაც მასზე გადის. ის მზადაა ამისთვის და კვალავ დიდების შეთავაზებით არდაღლილ და შეჩენილ მაცდურს პასუხობს: „ნათქვამია: ‘არ გამოცადო უფალი, ღმერთი შენი.’“
40 დღე უდაბნოში… ადვილია სათქმელად, რთული – გასავლელად. საკვების გარეშე, უწყლოდ, სიცხეში, ხვატში, ქვიშიან ქარებში, უდაბნოს მიღმა დატოვებული ღვთიური დიდების გარეშე, ადამიანურ ხორცში, ტკივილის მძაფრი შეგრძნებით… ადვილია სათქმელად, რთული – გადასატანად… და მან უარი არ თქვა ამაზე!
ის სრულყოფილი იყო, უნაკლო, წუნდაუდებელი, მასში არ იყო ცოდვა, მას არ სჭირდებოდა განწმენდა… და მაინც, მან აირჩია უდაბნო თავისი ადამიანური ბუნების გამოსაცდელად, მისიის დაწყებამდე, საბოლოო ცეცხლში გავლამდე, მან აირჩია – განეცადა ყველა ადამიანური ტკივილი და განსაცდელი, ყველა საცდური, ყველა უძლურება… და მან უარი არ თქვა ამაზე…
ის აღმოჩნდა მორჩილი სიკვდილამდე; თავმდაბალი, მიუხედავად სტატუსისა; მოსიყვარულე, მიუხედავად მის მიმართ გამოვლენილი სიძულვილისა; მშვიდი, მიუხედავად უსამართლო რისხვისა მისი მისამართით; მსხვერპლიანი, მიუხედავად ადამიანთა უმადურობისა; მტკიცე რწმენაში, მიუხედავად ღალატისა; უკუნისამდე მწყალობელი, ადამიანთა მიერ გამოტანალი უწყალო სასჯელის სანაცვლოდ…
მისი სახელია იესო! მასზე უამრავ ადამიანს სმენია, მაგრამ ცოტა თუ იცნობს. ისაა, ვინც უარი არ თქვა ჩვენს ხსნაზე! მისი სახელია იესო და ამ სახელშია გადარჩენა, გზა ჭეშმარიტება და სიცოცხლე!
2 კომენტარი
უფალო იესო ქრისტეო ძეო ღვთისაო შემიწყალე მე ცოდვილი ამინ.
ლამაზია იესო, ძე ღვთისა! ❤️