ზეცამდე მინდა სწრაფვა, სიკეთის შეცნობა მსურს უკუნისამდე, მაღლა ფრენა და მრავალი მთის დალაშქვრა მინდა, მაგრამ…
შეწყვიტე ოცნება, სანამ ხელში ქვა გიჭირავს და მზად ხარ, სხვისი მიმართულებით ისროლო იგი!
შეწყვიტე ოცნება, სანამ ტალახში ამოსვრილი მეგობრის ფერხთა განბანას არ ისწავლი!
შეწყვიტე ოცნება, თუ არ შეგიძლია, სარეველასაგან გაასუფთაო მეგობრის გული და მასში პატიება დათესო, რათა სიყვარული მოიმკო ნაყოფად!
შეწყვიტე ოცნება, მწვერვალზე ასული ლოდს თუ დააგორებ უპატიებელი გულიდან და წილის წილ მიაგებ მოყვასს, ანდა მტერს!
შეწყვიტე ოცნება, თუ ჯერ არასოდეს გითქვამს: „გაპატიე!..“
შეწყვიტე ოცნება, თუ მაღლობზე კენჭს ამოგიგდებენ, გაგეკაწრება, შენ კი პატიების ნაცვლად, ძლივს გაკვალულ გზას კი არ გააგრძელებ, არამედ მაღლობიდან დაბლა, ტალახთან ჩამოხვალ, რათა სამაგიერო გადაუხადო მსროლელს, მის სიმაღლეზე გასწორდე და სიბრაზემ დაგახრჩოს, დაგამძიმოს და ფრენის უფლება აღარ მოგცეს…
მითხარი, რა არ გეპატია შენ, რომ გაგიძნელდეს შენდობა სხვისი ბრალისა?!..
მითხარი, რომელი ხელით ცდილობ სხვის ჩაქოლვას, როცა იესომ ხელიდან ქვა ძირს დააგდო?
მითხარი, რომელი თესლი დათესილა და არ მოუმკიათ ნაყოფი?
მოიმკი, აუცილებლად მოიმკი შენს ნათესს:
სიკეთესა თუ ბოროტებას,
შებრალებას თუ გასამართლებას…
იგავნი სოლომონისა 10:12:
„სიძულვილი შუღლის აღმძვრელია, სიყვარული კი ყველა ცოდვას ფარავს.“
