▪ თუ არასოდეს გილოცია, რომ ღმერთმა შენი გული შეცვალოს, ნურც იმას ილოცებ, რომ მისი გული შეცვალოს.
მისი ( ) – ვისაც ვერ ეწყობი, ვისთანაც ცხადი ან დაფარული კონფლიქტი გაქვს.
მარტივია იმის დაჯერება, რომ ის არის დამნაშავე, მას შეეშალა, ის არ მოიქცა სწორად, ყველაფერი მისი ბრალია, მაგრამ ძალიან ხშირად ჩვენი ამგვარად გამოტანილი ყოველი დასკვნა ნაადრევი და მცდარი აღმოჩნდება ხოლმე.
იყავი ფხიზელი, იყავი კრიტიკული საკუთარი ქცევებისადმი, იყავი განმკითხველი საკუთარი თავისა და საკუთარი გულისა, რათა სიბრაზის და ბოღმის გამო არ ადანაშაულებდე ყოველთვის ყველას ყველაფერში და საკუთარ თავს კი არასოდეს არაფერში.
▪ ნუ ილოცებ, რომ ღმერთმა მას აუხილოს თვალები, თუ ჯერ საკუთარი თვალების ახელისთვის არ გილოცია, იქნებ შენ ვერ ხედავ სწორად.
კლაივ ლუისი ამბობდა, საკუთარი თავები მხოლოდ იმიტომ გვიყვარს, რომ ეს ჩვენ ვართო…
ზუსტად ამგვარად, შეიძლება, საკუთარ ქმედებებში ცუდს ვერაფერს ვხედავდეთ მხოლოდ იმიტომ, რომ ეს ჩვენ ჩავიდინეთ, მაგრამ თუ იმავეს სხვა ჩაიდენს, ვიტყვით, რომ ეს სისაძაგლე და უსამართლობაა.
▪ ვერ შეძლებ მდგომარეობის სწორად შეფასებას, თუ შენი გული არ იქნება წრფელი, სუფთა და მიუკერძოებელი.
სუფთა გული შექმენი ჩემში, ღმერთო და წრფელი სული განაახლე ჩემს სხეულში.
