სადა ხარ? სადა ხარ, როცა დაკარგული დაეხეტები ქუჩა-ქუჩა და არ იცი, სად მთავრდება ერთი გზა და სად იწყება მეორე. სადა ხარ? როცა დაიკარგე საკუთარ თავში, საკუთარი ტკივილისა და მწუხარების ლაბირინთში და არ იცი, სადამდე მიგიყვანს ბილიკი. სადა ხარ? მიხვდი, რომ ცხოვრება არც ზღაპარია და არც ისეთი უწყინარი, როგორიც გეგონა. გეგონა, შენით გაიკვლევდი გზას და შეცდი… სადა ხარ?
სადა ხარ, როცა დაკარგულ შვილს ასე ტკივილიანი ხმით მოგიხმობს ღმერთი და გზას გაჰყურებს, გზას, რომელზეც შენ უნდა გამოჩნდე სახლისკენ მიმავალი. სადა ხარ? ნუთუ ჩაიდინე ის, რაზეც გითხრა უფალმა, რომ არ ჩაგედინა? ნუთუ შენს მამას, შენს გამჩენს ზურგი აქციე და მაცდურს დაუჯერე? სადა ხარ? სად იმალები? მამა გეძახის. დაიკარგე… საკუთარ თავშიც ვეღარ გაგიგნია გზა და ვერც ცხოვრებაში… არც არავინაა, რომ ხელი მოგკიდოს და წინ წაგიძღვეს. ვერ გიპოვია გზის ვერც დასაწყისი და ვერც დასასრული. აღარ გახსოვს, როდის დაიწყო აგონია და ვერც იმას ხვდები, როდის დასრულდება. მხოლოდ შორიდან გესმის ხმა, მონატრებითა და ტკივილით სავსე ხმა. სადა ხარ?
სადა ხარ, როცა ასე გელოდება ის, ვინც შთაგბერა მარადიული სული, ვინც თვით მარადისობა ჩადო შენში, ვინც შენთვის დადო სიცოცხლე სამსხვერპლოზე ზვარაკად, რათა შენ, ჰო, შენ გქონოდა მისასვლელი სიცოცხლესთან… ზეცისკენ მიმავალი გზა გახსნილიყო შენ წინაშე… სადა ხარ? მიმოიხედე… ვერ ცნობ გარემოს. ვერ ცნობ ადამიანებს გარშემო. საკუთარი თავიც კი უცხოდ გეჩვენება და გარბიხარ. გაურბიხარ ადამიანებს, უცხოთა მზერას, საკუთარ თავსაც კი გაურბიხარ, საკუთარ გრძნობებს… წყენას, ტკივილს, რომელიც ამდენი ხანია, დაბუდებულა შენს გულში და ღრმად გაუდგამს ფესვები, როცა სულს გიღრღნიან ჩადენილი ცოდვები და არ იცი, სად გაექცე მათ…
სადა ხარ? როცა ასე მოგიხმობს ღმერთი. სადა ხარ? რომელ გზას ადგახარ? მობრუნდი. ეგ გზა წყვდიადით მთავრდება. მობრუნდი. აღარ არის მანდ მისავალი. თვალუწვდენელი უფსკრულია მხოლოდ. მობრუნდი. სინათლისკენ მობრუნდი. არ გესმის მამის ტკივილიანი ხმა? ის გზას გაჰყურებს და ერთი სული აქვს, როდის მოიხედავ, როდის გამოჩნდები ეულ ბილიკზე, რომ გამოიქცეს და ჩაგეხუტოს… და მოგცეს საუკეთესო, რაც აქვს… მიგიღოს უძღები ძე ისე, თითქოს არასოდეს წასულხარ მისგან… არასოდეს გიქცევია ზურგი მისთვის… შენ მხოლოდ მობრუნდი… სადა ხარ???
