რადგან ჩვენი ბრძოლა არ არის სისხლისა და ხორცის წინააღმდეგ, არამედ მთავრობათა წინააღმდეგ, ხელმწიფებათა წინააღმდეგ, ამ სიბნელის სამყაროს მპყრობელთა წინააღმდეგ, ცისქვეშეთის ბოროტების სულთა წინააღმდეგ.
ეს ციტატა ბიბლიიდან გვეუბნება, რომ ჩვენ ომში ვიმყოფებით, თითოეული ჩვენგანი. ეს ომი არ არის რაიმე ხორციელისა და მატერიალურის, ან სხვა ადამიანების წინააღმდეგ, არამედ სულიერი ომია ეშმაკისა და მისი დემონების წინააღმდეგ მიმართული…
„სოფლის სიბნელის მპყრობელი“, ანუ სატანა სტრატეგიულად უტევს ჩვენს გონებას, აზრებსა და ფიქრებს და ტყუილებით სიმაგრეების აშენებას ცდილობს. სიმაგრეების, რომლებიც ციხედ იქცევა ჩვენთვის, თუ არ შევეწინააღმდეგებით მას. ეს სიმაგრეები შიში, ეჭვი, ბუზღუნა აზრები, სხვადასხვა მცდარი მოსაზრებაა… ის დიდი ხნის განმავლობაში გვსწავლობდა, იცის, რა მოგვწონს და რა – არა, სად ვართ მტკიცენი და სად არის შესაძლებელი ჩვენი გატეხა. სწორედ ამის მიხედვით, სტრატეგიულად და დიდი მოთმინებით ნელ-ნელა გვიხერგავს გზას, უფლისაკენ მიმავალს…
ჩვენი გონებაა მთავარი ბრძოლის ველი
ვინაიდან ჩვენი საბრძოლო იარაღი ხორციელი არ არის, არამედ ღვთიური ძლიერება სიმაგრეთა დასანგრევად. იმით ვამხობთ ზრახვებს და ყოველ სიმაღლეს, რომელიც აღმართულია ღვთის ცოდნის წინააღმდეგ, და ვატყვევებთ ყოველგვარ აზრს ქრისტესთვის დასამორჩილებლად.
დასაწყისში წარმოდგენილი მუხლი გვაფრთხილებს არსებული, მაგრამ უხილავი ბრძოლის შესახებ, რომელიც მეტად მნიშვნელოვანია. შემდეგი მუხლი კი გვაწვდის ცოდნას იმის შესახებ, რომ ღმერთმა ამ ბრძოლაში გვიბოძა იარაღები, რომლითაც შესაძლებელია ბოროტის მიერ აღმართული სიმაგრეების დაძლევა ჩვენს გონებაში, რათა ვერ შევიცნოთ უფალი.
ჩვენ გვაქვს ძალა ბოძებული უფლისგან, რომლის მეშვეობითაც ყოველ აზრს, რომელიც ეცდება თავის ამაღლებას უფლის სიტყვაზე მაღლა, დავთრგუნავთ, დავატყვევებთ, განვდევნით ქრისტესთვის დასამორჩილებლად!
იარაღი, რომელიც დაგვეხმარება დავანგრიოთ სიმაგრეები, არის სიტყვა, ჭეშმარიტება. იოანეს სახარებაში, მე-8 თავის 31-32 მუხლებში იესო ამბობს: „თუ ჩემს სიტყვაში დარჩებით, ჭეშმარიტად ჩემი მოწაფეები ხართ, შეიცნობთ ჭეშმარიტებას და ჭეშმარიტება გაგათავისუფლებთ თქვენ“.
დაუპირისპირეთ ღვთის სიტყვა ბოროტის მიერ შთაგონებულ დამანგრეველ აზრებს, გააკეთეთ ხმამაღალი აღიარება და წარმოთქვით რწმენის და ნდობის სიტყვები უფლის მიმართ. ილოცეთ, მოუსმინეთ ღვთის სიტყვას, ქება-დიდება უძღვენით მას, ემადლიერეთ თუნდაც იმისთვის, რომ ეს დღე გაგითენათ.
გახსოვდეს, იმად იქცევი, რაზეც ფიქრობ!
აივსე შენი გონება ჭეშმარიტებით, რათა ბოროტის ტყუილებისთვის ადგილი არ დარჩეს!
ღმერთი ეძებს ადამიანებს, რომელნიც სრულ გზას გაივლიან მასთან ერთად, მიიღე გადაწყვეტილება, იყო ერთ-ერთი!
დანებება ადვილია, რწმენაა საჭირო – ბოლომდე მიხვიდე!..
ყოველთვის გამოგივა ეს? არა.
უნდა დანებდე? არავითარ შემთხვევაში!
რთულია ამის გაკეთება? დიახ.
შეუძლებელი? არანაირად!
როდესაც ბავშვი სიარულს სწავლობს, ხშირად ეცემა, სანამ მტკიცედ გაივლიდეს. ზოგიერთი დაცემა ძალიან მტკივნეულია, შეიძლება იტიროს კიდეც, თუმცა ყოველთვის დგება და თავიდან ცდილობს სიარულის სწავლას, ამაში მას მშობლებიც ეხმარებიან. უფალი ყველაზე დიდებული მშობელია, ის შენთან იქნება და შენს მარჯვენას დაიჭერს. უბრალოდ განაგრძე უფალთან თანამშრომლობა და არ დანებდე!!!
და დარწმუნებული ვარ, რომ ის, ვინც დაიწყო თქვენში კეთილი საქმე, დაასრულებს კიდეც იესო ქრისტეს დღემდე.
