სინათლე აღემატება სიბნელეს

• „მე ვარ სინათლე ქვეყნისა“ – ეს ქვეყნიერება სიბნელითაა მოცული, დამაბრმავებელი, დამღუპველი სიბნელით, ამ სიბნელის განდევნა კი მხოლოდ იესოს, მის სინათლეს ძალუძს!

• „ვინც მე მომყვება“ – ვინც იესოს კვალდაკვალ, მის ნაკვალევზე  დადის; ვისაც მასთან ურთიერთობა აქვს; ვინც მის მიერ ბიბლიიდან ნასწავლის მიხედვით ცხოვრობს.

• „ბნელში არ ივლის“ – რა გავლენა აქვს სიბნელეს ჩვენზე? საგნების ცხადად დანახვაში, რეალობის სრულად აღქმაში გვიშლის ხელს, გვაბრმავებს… დაბრმავებულნი კი ერთ დღეს შეიძლება ხრამში გადავიჩეხოთ: „ბნელში მოარულმა არ იცის, საით მიდის“ (იოანეს სახარება 12:35). სინათლე, რომელსაც იესო იძლევა, თვალისჩინია; მალამოა სულიერი თვალებისთვის, რომელიც ქვეყნიერების სიბნელით გამოწვეულ სიბრმავეს კურნავს, სიცოცხლეს იძლევა და გვიცავს ხრამში გადაჩეხვისგან.

• „სიცოცხლის სინათლე ექნება“ – იესოსთან ურთიერთობით სიცოცხლის სინათლე ინთება ჩვენში და როგორც იესოა ნათელი ამ ქვეყნისთვის, ასევე ჩვენც ვიქცევით სინათლედ, როგორც წერია:

• იოანეს სახარება 12:46:

„მე სინათლედ მოვედი წუთისოფელში, რათა არცერთი, ვისაც ჩემი სწამს, არ დარჩეს ბნელში.“

• იოანეს სახარება 12:36:

„სანამ გაქვთ სინათლე, ერწმუნეთ მას, რათა გახდეთ სინათლის ძენი.“

• ფილიპელთა მიმართ 2:15:

„რათა შეიქნათ უბიწონი და სუფთანი, ღვთის შეუბილწავი შვილები ჭირვეულ და უკუღმართ თაობაში, რომელშიც ისე ანათებთ, როგორც მნათობები სამყაროში.“

• მათეს სახარება 5:14,16:

„თქვენ ხართ ქვეყნიერების სინათლე. მთის წვერზე მდებარე ქალაქი ვერ დაიმალება.  ასევე ანათებდეს თქვენი სინათლე ადამიანთა წინაშე, რათა ხედავდნენ ისინი თქვენს კეთილ საქმეებს და ადიდებდნენ თქვენს მამას, რომელიც ზეცაშია.“

დიახ, ქვეყნიერებაზე სიბნელე ბატონობს, მაგრამ იესო გვეუბნება, რომ მისი სინათლე დედამიწაზე გაბატონებულ სიბნელეს დევნის, ის ასევე ნათელ მითითებას გვაძლევს, თუ როგორ გავხდეთ ამ სინათლის მატარებელნი – ვიცხოვროთ ისე, როგორც მან მოგვიწოდა!